Die Inselglocke Baltrum
Baltrumer Geschichte und Geschichte 

Peterohms Norderney-Fahrt 
n' Bietjet van Baltrum. 

Baltrum is 'n moi lütjet Eiland un vandag ook 'n Bad mit Hotels, Pensionen, Strandhall un wat'r mehr is. To mien Tied weer dat noch anners, dor stunnen dick dartig Husen, lütjet un eenfach, so as de Lüh ook weeren, dat heet so völ, dat sallen se nu ook woll noch wäsen. - 

Wie harren 't Jahr 1866, as de Krieg tüsken Prüßen un Oesterriek utbrook; Hannover kwam d'r ook noch tüsken. Eens goden Abends legg dor so'n groot Kriegsschipp achter dat Baltrumer Riff an; 't weer 'n prüß Kanonenboot. Een Offzeer mit twee Soldaten stegen in 'n lütjet Boot un leggten sück an de Baltrumer Strand vör Anker, wo nu dat Regierungshus steiht. Dann gungen se nah 't Dörp un bi't erste Hus, wor se ankwemen, gungen se rin. Hier woh'n Peterohm mit sien Antjemöj, de sück düchtig verfeer, as de Offzeer up de Dääl stunn. „Ji kennen as Fahrensmann ja woll dat Fahrwasser nah Nördernee", säh de Offzeer „un moten uns henlotsen". Peterohm verfeer söck düchtig, un sin Antje triller as'n Rüsk. Man dat hulp nicks, he mußt' mit. Nu truck he sien groot Stäfels an, un nehm noch 'n Schlatje achter de Kusen, un do ginkt los. As se bit 't Kanonenboot ankwemen, avernehm Peterohm dat Kommando un broch her richtig nah Nördernee, wor se bi de Giftbud anlegten. Dann gung de Offzeer mit 'n heel Bült Soldaten, Peterohm vörup, nah't Konversationshus, wo de Badecommissar Baron Bock von Wülfingen wohnte, de se gefangen nehmen sullen. De Commissar leeg in 't Bedd, man se kregen hum bi't Kanthaken un brocht'n hum nah't Kriegsschipp. Vörher kreeg Peterohm van de Offzeer 'n heel Bühl vull Geld un kunn nu nah Hus gaan. Anner Dag gung he mit Seilschipp nah Nordiek un van dor, Diek lang, nah Dreehusen un mook, dat he aver 't Watt nah Baltrum kweem. Sien Antje was blied, dat hör Peter dor wär weer, un noch blieder, as se de grote Bühl mit Geld seech. Se mook hannig 'n gooden Tass Tee, Kluntje keek dar boven ut. 

Nach Erzählung seines Vaters von Eilt Honken Eilt Evers 1927 niedergeschrieben und von mir bearbeitet 

Edelgard Graß 
Die Inselglocke Baltrum, Sonderausgabe zur 600-Jahr-Feier der Insel Baltrum, Ostern 1998